विदर्भातील हिरकणींचा गौरव

विदर्भातील विविध क्षेत्रांत आपल्या कार्याचा ठसा उमटविणार्‍या हिरकणींच्या कर्तृत्वाला लोकमत सखी मंचने लोकमत विदर्भ सखी गौरव अवॉर्ड देऊन मदर्स डेच्या पूर्वसंध्येला शनिवारी सलाम केला.

लोकमत विदर्भ सखी गौरव अवॉर्ड २0१२ व जीवनगौरव पुरस्कार प्रदानाचा शानदार सोहळा शनिवारी सायंकाळी नागपुरातील चिटणीस पार्कवर पार पडला. यावेळी प्रमुख पाहुण्या म्हणून राष्ट्रीय महिला आयोगाच्या अध्यक्ष ममता शर्मा उपस्थित होत्या. व्यासपीठावर मातोश्री वीणादेवी दर्डा, लोकमत मीडिया लिमिटेडचे चेअरमन खासदार विजय दर्डा, लोकमत सखी मंचच्या अध्यक्ष ज्योत्स्ना दर्डा, रोजगार हमी योजना मंत्री नितीन राऊत उपस्थित होते.

या कार्यक्रमात विविध क्षेत्रांत उल्लेखनीय कार्य करणार्‍या सात महिलांचा लोकमत विदर्भ सखी गौरव पुरस्कार देऊन व महिलांच्या उत्थानासाठी झटणार्‍या विदर्भातील आठ ज्येष्ठ महिला समाजसेविकांचा लोकमत सखी जीवनगौरव पुरस्कार देऊन सन्मान करण्यात आला.

लोकमत विदर्भ सखी गौरव पुरस्कारासाठी सामाजिक क्षेत्रातील पुरस्कारासाठी बुलडाण्यातील येथील स्त्री मुक्ती संघटनेचे कार्य करणार्‍या शाहिना पठाण, शुभदा देशमुख, रजिया सुल्ताना, रेखा पिंपळशेंडे व झिंगुबाई बोलके यांना नामांकन मिळाले होते. शाहिना पठाण यांना हा पुरस्कार ममता शर्मा यांच्या हस्ते प्रदान करण्यात आला. पुष्पगुच्छ, सन्मानपत्र व स्मृतिचिन्ह असे या पुरस्काराचे स्वरुप होते. क्रीडा क्षेत्रासाठी अरुंधती पानतावणे, अंध जलतरणपटू कांचनमाला पांडे, तृप्ती गायधने, मोनिका व रोहिणी राऊत आणि शीतल भोयर यांना नामांकन मिळाले होते.

कांचनमाला पांडे यांना हा पुरस्कार घोषित झाला. शौर्य क्षेत्रासाठी गडचिरोलीतील पोलीस शिपाई कमला आलाम, मनीषा तुरा, मेधा साठे व सुहासिनी मेश्राम यांना नामांकन मिळाले होते. हा पुरस्कार कमला आलाम यांना घोषित झाला. शैक्षणिक क्षेत्रासाठी डॉ. कमल सिंग, सुचिता सोळंके, डॉ. प्रीती बजाज, डॉ. शोभा ग्रोवर व डॉ. थ्रीटी पटेल यांना नामांकन मिळाले होते. डॉ. कमल सिंग यांना हा पुरस्कार मिळाला. साहित्य क्षेत्रासाठी अंजनाबाई खुणे, उषाकिरण आत्राम, अपूर्वा सोनार, प्रभा गणोरकर, अरुणा सबाने यांचे नामांकन होते. या पुरस्कारासाठी अपूर्वा सोनार यांची निवड झाली.
वैद्यकीय क्षेत्रासाठी प्रा. अनुराधा श्रीखंडे, डॉ. दीप्ती जैन, डॉ. कविता सातव, डॉ. विभावरी दाणी व डॉ. अर्चना पटेल यांना नामांकन मिळाले होते. डॉ. अर्चना पटेल यांना हा पुरस्कार मिळाला. उद्योग क्षेत्रासाठी डॉ. ऋचा जैन, डॉ. अनिता राव, गीता कोठा, प्रियांजली सन्याल व आरती देवधर गान यांना नामांकन मिळाले होते. पुरस्कार प्रियांजली सन्याल यांना मिळाला.

संचालन श्‍वेता शेलगावकर यांनी केले. या समारंभाचे प्रायोजक व्हिडिओकॉन तर जीएमआर करमणूक पार्टनर होते. रायसोनी ग्रुप सहप्रायोजक होते. यूसीएन, रेडिओ मिर्ची व जेमिनी यांनी या सोहळ्यासाठी सहाय्य केले.