दहावी ऑनलाईन

अभ्यास करायचा आणि तोही वेबसाइटच्या मदतीनं...येस्स , दहावीच्या मुलांचा अभ्यास सोपा व्हावा म्हणून त्यांनी इ-लर्निंगच्या संकल्पनेचा पुरेपूर वापर करून घेतला. जठार कुटुंबातल्या पाच भावंडांनी एकत्र येऊन एसएससीच्या मुलांसाठी अशी वेबसाइटच सुरू केलीय.

एकाच कुटुंबातील चार समवयस्क भावंडं एकत्र आली की एकमेकांची खेचाखेची , धमाल-मस्ती यातच वेळ निघून जातो. जठार कुटुंबातल्या भावंडांनी मात्र हा समज खोडून काढत काहीतरी वेगळं करून दाखवलं. अमित जठार , नितीन जठार , विशाल कुलकर्णी , वैभव जोशी ही चार चुलत , मावस भावंडं आणि नितीनची पत्नी राजश्री जठार अशी या पाचजणांची नावं. या सगळ्यांनी एकत्र येऊन दहावीच्या विद्यार्थांसाठी एक आगळी वेबसाईट सुरु केली आहे.

इंजिनीअर असलेल्या नितीनने शेवटच्या वर्षाची परीक्षा झाल्यानंतर सुट्टीमध्ये आपल्याच ओळखीतील एका दहावी नापास होणाऱ्या मुलाचा अभ्यास घेण्यास सुरुवात केली. त्या मुलाच्या गणित विषयासाठी नितीनने त्याच्यावर खूप मेहनत घेतली आणि तो पास झाला. गणित आणि विज्ञान या विषयात पारंगत असलेल्या नितीनने यानंतर ग्रूप ट्युशन्स सुरु केल्या. पण अभ्यासाची पुस्तकं वाचताना मुलांना येणारा कंटाळा आणि त्यांचं वाढणारं औदासिन्य नितीनच्या लक्षात आलं. मुलांसाठी काहीतरी इंटरअॅक्टीव करावं असं त्याला वाटू लागलं. त्याने आपला भाऊ अमितसोबत या विषयावर चर्चा केली आणि वेबसाईटची संकल्पना पुढे आली.

या प्रोजेक्टमध्ये त्यांनी आपली मावस भावंड विशाल आणि वैभव यांनाही सहभागी करून घेतलं. आर्टिस्ट असलेली नितीनची पत्नी राजश्रीही या प्रोजेक्टमध्ये आली. दहावीच्या अभ्यासक्रमातले बारकावे तपासून वेबसाईटवर कोणता भाग अॅनिमेशन स्वरुपात द्यायचा , कोणत्या भागात आकृत्या द्यायच्या याबात मार्गदर्शन घेण्यासाठी आठ शिक्षकांची एक टीम तयार केली. आणि त्यांच्या सूचनेनुसार वेबसाईटवर ठिकठिकाणी गरजेनुसार अॅनिमेशन , आकृत्या , फोटो अपलोड करण्यात आले. यामुळे या भावंडांची www.ssconline.com ही वेबसाईट वेगळी ठरली आहे. दोन आठवड्यांपूर्वी सुरु झालेल्या या वेबसाईटला तब्बल १० हजारांहून अधिक हिट्स मिळाल्या आहेत. या साईटवर विद्यार्थ्यांना मॉक टेस्ट , समुपदेशन आदी गोष्टी उपलब्ध करून देण्यात येणार आहेत. सध्या इंग्रजी माध्यमासाठी उपलब्ध असलेली ही वेबसाईट लवकरच मराठी माध्यमासाठीही उपलब्ध होईल.

शाळांना मोफत वेबसाईट
शासनाच्या नव्या निर्णयानुसार सर्व शाळांना त्यांची स्वतःची वेबसाईट असणं क्रमप्राप्त आहे. पण सगळ्या शाळांनाच ते शक्य होईल असं नाही. यासाठी ही भावंडं त्यांना मदत करणार असून ते शाळांना मोफत वेबसाईट सुरू करून देणार आहेत. यामध्ये शाळेला प्रोफाइल पेज , फोटो गलेरी , नोटीस बोर्ड आणि वेळापत्रक अशी चार पेजेस देण्यात येतील.