मटर पनीर

पावसाळ्यानंतर मटर मोठ्या प्रमाणावर बाजारात उपलब्ध होतात. त्याचबरोबर विशेषत: पावसाळ्यात खाण्यापिण्याच्या बाबतीतही विशेष काळजी घेण्याचा सल्ला दिला जातो. कारण नव्या पावसामुळे आणि उघड्यावर असलेल्या भाजीपाल्यामुळे अनेक संसर्गजन्य रोग होऊ शकतात. म्हणून पावसाळ्यात भाजीपाला घेतल्यानंतर तो गरम पाण्याने धुवून घ्यावा, असा सल्ला दिला जातो. मटर हे शेंग स्वरुपात असल्याने चांगली निघतात. मात्र त्यात मटर दाण्याच्या रंगातली किड असली तर ती पाहून घ्यावी. मटर दाणे पनीर मध्ये टाकून अतिशय सुंदर लागतात.

यासाठी साहित्यात एक मोठा कांदा, टोमॅटो पेस्ट (प्युरी), ८-१० काजू, एक वाटी मटर, पनीर, आल-लसूण पेस्ट, जीरे, हळद, तिखट, मीठ, तमालपत्र, कस्तुरी मेथी, दालचिनी पूड घ्यावी.

मटर पनीर करताना प्रथम पनीरचे तुकडे करुन बटरमध्ये लालसर फ्राय करावे. काजू पाण्यात वाफवून त्याची पेस्ट करावी. कांदा तेलात परतून तो मिक्सीमधून काढून घ्यावा. एकीकडे बटर चांगले तापवून त्यात जिरे, हळद, तिखट, तमालपत्र घ्यावे. नंतर कांद्याची प्युरी आलं-लसूनाची पेस्ट घालून थोडा वेळ परतावे. नंतर टोमॅटो प्युरी आणि काजूची पेस्ट त्यामध्ये मिसळावी. जेवढी दाट ग्रेव्ही हवी असेल त्या प्रमाणात पाणी घालून उकळी आणावी. त्यानंतर मटर, दालचिनी पूड, कस्तुरी मेथी त्यात मिसळावी. सर्वात शेवटी पनीर मिक्स करावे.

हे मटर पनीर गरमागरम पुरीसोबत अथवा फुलक्यासोबत अत्यंत चांगले लागते. एखाद्या रविवारी हा पदार्थ बनविण्यास काहीही हरकत नाही.