स्टेट बँक नऊ हजार 500 कर्मचा-यांची करणार भरती

देशातील सर्वात मोठी बँक असलेली भारतीय स्टेट बँक चालू आर्थिक वर्षात 9,500 कर्मचा-यांची भरती करणार आहे.

नवी दिल्ली- देशातील सर्वात मोठी बँक असलेली भारतीय स्टेट बँक चालू आर्थिक वर्षात 9,500 कर्मचा-यांची भरती करणार आहे. रिटेल व्यवसायावर लक्ष केंद्रित करण्याचा बँकेने निर्णय घेतला असून यासाठी यंदा नवीन भरती करण्यात येणार आहे.

सध्याची आर्थिक स्थिती कठीण असली बँक व्यवसाय वाढण्यासाठी प्रयत्नशील असल्याचे बँकेचे अध्यक्ष प्रतीप चौधरी यांनी सांगितले. येत्या काही वर्षात बँकेसाठी रिटेल व्यवसाय हा केंद्रस्थानी राहणार असून याच्या विस्तारासाठी बँकेकडून योग्य ते निर्णय घेतले जातील, असेही चौधरी यांनी बँकेच्या वार्षिक अहवालामध्ये भागधारकांना लिहिलेल्या पत्रामध्ये म्हटले आहे.

गेल्या वर्षभरात एकूण कर्मचा-यांपैकी 7,452 कर्मचारी कमी झाले असल्याचेही बँकेने अहवालात म्हटले आहे. मात्र चालू वर्षात नव्याने 9,500 लिपिकांची भरती करण्यात येणार असल्याचे त्यांनी सांगितले. रिटेल, मोटार कर्ज, गृहकर्ज या व्यवसायामध्ये आजही एसबीआय आघाडीवर आहे. 31 मार्च 2012 पर्यंत बँकेने 1,82,427 कोटींच्या कर्जाचे वितरण केले.

यामध्ये 10.9 टक्क्यांची वाढ झाली. बँकिंग क्षेत्रातील आपला दबदबा कायम राहण्यासाठी बँक नवीन भरती करून रिटेल व्यवसाय आणखी भक्कम करणार आहे.